ទំនាស់រវាងលោកនាយករដ្ឋមន្ត្រី ហ៊ុនសែន និងលោកស្រី មួរសុខហួរអ្នកតំណាងរាស្រ្តគណបក្សសមរង្ស៊ីកាន់តែឈានទៅតឹងតែងឡើង ជាលំដាប់នារយៈពេលចុងក្រោយនេះ។ ពាក្យបណ្តឹងតបរបស់មេធាវីរដ្ឋាភិបាលកាលពីថ្ងៃសុក្រដោយមានការ ព្រមានពីការដកអភ័យឯកសិទ្ធិសភាពីតំណាងរាស្រ្តបក្សប្រឆាំងក្នុងគូ ទំនាស់ផងនោះគឺជាចំណោទបញ្ហាថ្មីមួយទៀតបន្ថែមទៅលើបញ្ហាដែល កំពុងតានតឹងស្រាប់។
លោក ហ៊ុន សែន និងលោកស្រី មូ សុខហួរ
មួយថ្ងៃបន្ទាប់ពីលោកស្រី មួរ សុខហួរ អ្នកតំណាងរាស្រ្តគណបក្សសមរង្ស៊ីបានប្រកាសថានឹងដាក់ពាក្យបណ្តឹង មួយទៅតុលាការប្រឆាំងនឹងលោក នាយករដ្ឋមន្ត្រីហ៊ុនសែន ពីបទបរិហារកេរ្តិ៍មកពាក្យបណ្តឹងដែលបានទៅដល់ដៃតុលាការមុនគេ គឺមិនមែនជារបស់លោកស្រី មួរ សុខហួរ ទេតែគឺជាពាក្យបណ្តឹងរបស់មេធាវីរដ្ឋាភិបាលប្រឆាំងលោកស្រី មួរ សុខហួរ ទៅវិញ។
អមជាមួយពាក្យបណ្តឹងនេះលោកស្រីតំណាងរាស្រ្តបក្សប្រឆាំងត្រូវ បានគេព្រមានថាអាចនឹងត្រូវគេដកអភ័យឯកសិទ្ធិសភាដើម្បីឲ្យតុលាការ ចាត់ការតាមផ្លូវច្បាប់ទៀតផង។ នេះជាចំណោទបញ្ហាថ្មីមួយទៀតដែលកំពុងដុតកំដៅឆាកនយោបាយប្រទេស កម្ពុជាដែលមានឧិកាសតិចតួចនៅឡើយក្នុងការស្ថិតនៅក្នុងស្ថានភាព ស្ងប់ស្ងាត់។
តាមពិតដើមចមនៃបញ្ហាបានកើតចេញពីសង្គ្រាមពាក្យ សម្តីតាមរលកធាតុអាកាសតែប៉ុណ្ណោះនិយាយតាមន័យនយោបាយគឺការរិះគន់ គ្នាដែលប្រទេសប្រកាន់របបប្រជាធិបតេយ្យចាត់ទុកថាជាសិទ្ធិរបស់ បុគ្គលម្នាក់ៗ ដែលត្រូវគោរពនិងការពារ។
កម្ពុជាក៏ជាប្រទេស ដែលប្រកាន់យកលទ្ធិប្រជាធិបតេយ្យមួយនឹងគេដែរប៉ុន្តែសេរីភាពក្នុង ការបញ្ចេញមតិគឺជាកម្មវត្ថុនៃការពិភាក្សានយោបាយដ៏សកម្ម និងចម្រូងចម្រាស់មួយ។ ស្ថិតនៅក្នុងស្ថានភាពប្រជាធិបតេយ្យដែលមិនទាន់រឹងមាំ ទំនាស់ដែលផ្តើមចេញពីការអនុវត្តន៍ប្រជាធិបតេយ្យបានកើតឡើងជា ញឹកញាប់មិនថានៅក្នុងចំណាមប្រជាពលរដ្ឋសាមញ្ញ ឬក្នុងចំណាមអ្នកនយោបាយនោះឡើយ។
រឿងរ៉ាវដែលបានដាក់ឲ្យលោក នាយករដ្ឋមន្រ្តី ហ៊ុន សែន និងលោកស្រី មួរ សុខហួរស្ថិតនៅជាគូបដិបក្ខយ៉ាងជូរចត់ជាមួយគ្នានៅពេលនេះ អាចជាឧទាហរណ៍មួយដែលគេអាចលើកយកមកឆ្លុះបញ្ចាំងបាន។ តាមរយៈទំនាស់នេះគេអាចទាញចេញជាសេចក្តីសន្និដ្ឋានមួយចំនួនដូច ខាងក្រោម។
ជាបឋមគេគួរសង្កត់ធ្ងន់ថា ការដាក់ពាក្យបណ្តឹងទៅតុលាការដើម្បីរកយុត្តិធម៌ក្នុងរឿងណាមួយ រាប់ទាំងរឿងរ៉ាវដែលកើតចេញពីពាក្យសម្តីផងគឺជាសិទ្ធិស្រប ច្បាប់របស់បុគ្គលគ្រប់រូប ជាពិសេសនៅក្នុងសង្គមប្រជាធិបតេយ្យតែម្តង។ ប៉ុន្តែនៅលើទិដ្ឋភាពនយោបាយវិញ ទំនាស់នេះបានបង្ហាញពីអរិភាពធ្ងន់ធ្ងររវាងកម្លាំងប្រជែងនយោបាយនៅ ក្នុងប្រទេសនេះ។ ជាពិសេសវាបានបង្ហាញពីឆាកនយោបាយមួយដែលប្រកបដោយកំហឹង និងការគុំគួន។
ការធ្វើនយោបាយប្រកបដោយកំហឹងនិងការគុំគួន គ្នានេះ គឺវាងាយនឹងរុញច្រានប្រទេសឲ្យធ្លាក់ក្នុងភាពវឹកវរខ្លាំងណាស់ ឬពេលខ្លះនាំដល់ការបង្ហូរឈាមក៏មាន។ វិបត្តិនយោបាយនៅប្រទេសថៃបច្ចុប្បន្ន ក៏ត្រូវគេមើលឃើញថាជាលទ្ធផលនៃនយោបាយប្រកបដោយកំហឹងនេះផងដែរ។ អតីតកាលរបស់ប្រទេសកម្ពុជារបស់យើង ក៏ជាពិសោធន៍គ្រប់គ្រាន់ណាស់ទៅហើយសម្រាប់ដកស្រង់មេរៀន។
ម្យ៉ាង ទៀតការប្តឹងផ្តល់គ្នារវាងអ្នកនយោបាយនៅក្នុងទំនាស់ពាក្យសម្តី បន្តិចបន្តួច ឬបើទោះបីជាពេលខ្លះមានការលើសលោះដាក់គ្នាទៅវិញទៅមកខ្លះៗ នោះក៏ដោយចុះក៏ជារឿងមួយគួរឲ្យចៀសវាងពីព្រោះថា ម្យ៉ាងវាធ្វើឲ្យវប្បធម៌នៃការរិះគន់គ្នាដែលជាមូលដ្ឋានគ្រឹះនៃ លទ្ធិប្រជាធិបតេយ្យកាន់តែរិចរឹលទៅៗ។ និងម្យ៉ាងទៀតគឺវាធ្វើឲ្យមានភាពតានតឹងដែលនាំឲ្យអាប់អួរដល់ បរិយាកាសនយោបាយជាទូទៅ ទាំងនៅលើឆាកនយោបាយជាតិ និងអន្តរជាតិ។
ដើម្បី ចៀសវាងបញ្ហានេះបានអ្នកនយោបាយគួរបង្កើនការទទួលខុសត្រូវ និងការគោរពគ្នាទៅវិញទៅមកឲ្យបានខ្ពស់នៅក្នុងការប្រើប្រាស់ សិទ្ធិប្រជាធិបតេយ្យរបស់ខ្លួន។ ការបន្ស៊ាំខ្លួនឲ្យបានល្អទៅនឹងពាក្យរិះគន់ ដោយពង្រីកវប្បធម៌ជជែកបកស្រាយបញ្ហាដោយសន្តិវិធី គឺជាគោលការណ៍គ្រឹះនៃលទ្ធិប្រជាធិបតេយ្យដែលអ្នកនយោបាយទាំងអ្នក កាន់អំណាចទាំងអ្នកប្រឆាំងត្រូវប្រកាន់យក។
បើពុំដូច្នោះទេពួកគេពិបាកនឹងស្វែងរកភាពស្ងប់សុខជូនប្រទេសជាតិរបស់ខ្លួនខ្លាំងណាស់៕
free programes
Read more!
0 comments:
Post a Comment