តាំងពីឆ្នាំ២០០៤មក ភេរវកម្ម និងឃាតកម្មបានកើតឡើងសឹងមិនលោះថ្ងៃ នៅតំបន់ប៉ែកខាងត្បូងនៃប្រទេសថៃ។ មកទល់ឥឡូវ គេនៅមិនទាន់ស្គាល់ឈ្មោះអង្គការភេរវកម្ម ដែលបង្ករហឹង្សា និងមូលហេតុពិតប្រាកដ នៃអំពើសាហាវយង់ឃ្នងទាំងនេះនៅឡើយទេ។ ម៉្លោះហើយបានជារដ្ឋាភិបាលថៃ និងសហរដ្ឋអាមេរិកព្រួយបារម្ភខ្លាំងឡើងៗ។
ផែនទី នៅប៉ែកខាងត្បូងប្រទេសថៃ
ថៃជាប្រទេសកាន់ព្រះពុទ្ធសាសនា ក៏ប៉ុន្តែមានខេត្តចំនួន៣ដែលប្រជាជនភាគច្រើនជាអ្នកកាន់សាសនាអ៊ីស្លាម គឺណារ៉ាត់ធីវ៉ាត់ (Narathiwat) ប៉ាត់តានី (Pattani) និងយ៉ាឡា (Yala)។ តាំងពីឆ្នាំ២០០៤មក ខេត្តទាំង៣នេះ ដែលឋិតនៅប៉ែកខាងត្បូងនៃប្រទេសជួបប្រទះនឹងអំពើហិង្សាបង្កឡើង ដោយពួកអ៊ីស្លាមជ្រុលនិយម។ដើមដំបូងបង្អស់ ពួកគេបានវាយប្រហារទៅលើបន្ទាយទាហាន និងប៉ុស្តិ៍នគរបាលនៅ Narathiwat ។ ជាការឆ្លើយតបវិញ រដ្ឋាភិបាលទីក្រុងបាងកក ដែលកាលណោះដឹកនាំដោយលោក Thaksin Shinawatra បានប្រកាសដាក់តំបន់ប៉ែកខាងត្បូងក្រោមច្បាប់អាជ្ញាសឹក។
ក្រោយមកទៀត នៅខែមេសា ឆ្នាំ២០០៤ដដែលនោះ ពួកអ៊ីស្លាមជ្រុលនិយមជាច្រើនរយនាក់ ខ្លះប្រដាប់ទៅដោយកាំភ្លើង ខ្លះទៀតប្រដាប់ទៅដោយកាំបិតខ្វែវ បានវាយប្រហារជាថ្មីទៅលើបន្ទាយទាហាន និងស្នងការដ្ឋានប៉ូលិស។ នៅក្នុងការប្រយុទ្ធគ្នានោះ ពួកអ៊ីស្លាមជ្រុលនិយមជាងមួយរយនាក់បានបាត់បង់ជីវិត។ ពេលនោះហើយ គឺជាពេល ចាប់ផ្តើមឡើងនៃសកម្មភាពទ័ពព្រៃដែលបានបន្តមកទល់សព្វថ្ងៃនេះ។
រហូតមកដល់ថ្ងៃនេះ គេនៅតែរកមិនឃើញមូលហេតុពិតប្រាកដ ដែលបានជម្រុញឲ្យប្រជាជនថៃអ៊ីស្លាមងើបបះបោរប្រឆាំងនឹងអាជ្ញាធរថៃ នៅដើមឆ្នាំ២០០៤ នោះនៅឡើយទេ។ ក្រុមអ្នកសង្កេតការណ៍ខ្លះអះអាងថាអ្នកដែលបានបង្ករឿងមុនគេ គឺយោធាថៃ ហើយមិនមែនពួកថៃអ៊ីស្លាមទេ។ ពួកគេពន្យល់ថា អំពើហិង្សាបានកើតឡើងតែប៉ុន្មានសប្តាហ៍ប៉ុណ្ណោះ ក្រោយពីលោកនាយករដ្ឋមន្ត្រី Thaksin បានដកតួនាទីគ្រប់គ្រងសន្តិសុខ ខេត្ត Narathiwat ខេត្ត Pattani និងខេត្ត Yala ពីដៃកងទ័ព និងប្រគល់សមត្ថកិច្ចនេះទៅឲ្យកងនគរបាលក្តោបក្តាប់វិញ។ យោងតាមក្រុមអ្នកសង្កេតការណ៍ទាំងនេះ សេចក្តីសម្រេចចិត្តបែបនេះរបស់លោកThaksin បានបណ្តាលឲ្យនាយទាហានថៃខ្លះបាត់បង់កន្លែងខ្លាញ់ និងបាត់បង់កម្រៃដែលបានមកពីសកម្មភាពមិនស្របច្បាប់ ដូចជាពេស្យាចារ និងការរត់ពន្ធគ្រឿងញៀនជាដើម ហើយបានជម្រុញឲ្យពួកគេបង្កហេតុ បញ្ឆេះកំហឹងរបស់ពួកថៃអ៊ីស្លាមដែលរស់នៅទីនោះ។
ក្រុមអ្នកសង្កេតការណ៍ខ្លះទៀត យល់ឃើញថា អង្គការភេរវកម្ម Jamaah Islamiyah បាន ចូលទៅអុចអាលឲ្យប្រជាជនថៃអ៊ីស្លាមបះបោរទាមទារឯករាជ្យ និងផ្តាច់ដែនដីប៉ែកខាងត្បូងនៃប្រទេសថៃចេញពីការត្រួតត្រា របស់ទីក្រុងបាងកក។
ទោះជាយ៉ាងណាក៏ដោយ នៅក្នុងដែនដីប៉ែកខាងត្បូងប្រទេសថៃ ដែលជាប់ព្រំប្រទល់ ជាមួយប្រទេសម៉ាឡេស៊ី តែងតែ មានអំពើហិង្សាកើតឡើងយូរៗម្តង តាំងពីឆ្នាំ១៩០៩ មកម៉្លេះ។ ក៏ប៉ុន្តែ អំពើហិង្សានៅទីនោះមិនដែលមានទ្រង់ទ្រាយធំនិងបន្តយូរអង្វែងដូច ពេលនេះទេ។ គួរគូសបញ្ជាក់ថា តាំងពីឆ្នាំ២០០៤មកទល់ឥឡូវ សកម្មភាពទ័ពព្រៃរបស់ពួកអ៊ីស្លាមជ្រុលនិយមនៅប្រទេសថៃបានបណ្តាល ឲ្យមានអ្នកស្លាប់ជិត២ពាន់នាក់ហើយ។
តាំងពីឆ្នាំ២០០៥មក ពួកថៃអ៊ីស្លាមជ្រុលនិយមបានប្តូរយុទ្ធសាស្រ្ត មិនសូវសម្លាប់តំណាងអាជ្ញាធរនគបាល ឬទាហាន ដូចមុនទៀតទេ តែវាយប្រហារទៅលើលោកសង្ឃ គ្រូបង្រៀនឬពុទ្ធបរិស័ទវិញម្តង។ អ្វីដែលធ្វើឲ្យរដ្ឋាភិបាលថៃបារម្ភនោះ គឺអំពើហិង្សាដែលបាននិងកំពុងបន្តរាលដាលចេញពីខេត្តអ៊ីស្លាម ទាំងបីនេះចូលទៅដល់ខេត្តជិតខាង ជាទីដែលមិនសូវមានអ្នកកាន់សាសនាអ៊ីស្លាមរស់នៅសោះ។ ឧទាហរណ៍ជាក់ស្តែង នៅខែមករា ឆ្នាំ២០០៧ ភេរវកម្មបំផ្ទុះគ្រាប់បែកប្រាំបីកន្លែងសឹងតែផ្ទួនៗគ្នា បានត្រូវបង្កឡើង ទៀតផង នៅកណ្តាលទីក្រុងបាងកក។ កាលណោះ ក្រុមនាយទាហានដែលបានធ្វើ រដ្ឋប្រហារទម្លាក់លោក Thaksin បានចោទថាបក្សពួករបស់លោក Thaksin គឺជាអ្នកនៅពីក្រោយភេរវកម្មអស់ទាំងនោះ។ ក្រុមអ្នកសង្កេតការណ៍ខ្លះវិញ និយាយថាអាចជាស្នាដៃរបស់ពួកអ៊ីស្លាមជ្រុលនិយម ដែលពីពេលនេះទៅ មានបណ្តាញធំនិងមាំជាងមុន រហូតដល់មានលទ្ធភាពចូលមកបង្កភេរវកម្ម ដល់កណ្តាលរាជធានីថៃតែម្តង។
មកទល់ឥឡូវ គេពិបាកវិភាគណាស់ទៅលើបាតុភាពទ័ពព្រៃអ៊ីស្លាមជ្រុលនិយមនៅប្រទេស ថៃ។ ពីព្រោះ គេមិនដែលស្គាល់ឈ្មោះក្រុមភេរវជន ឬអង្គការភេរវកម្មដែលបានបង្កអំពើហិង្សាទាំងនេះទេ។ តាមមើលទៅ គោលដៅរបស់ពួកអ៊ីស្លាមជ្រុលនិយម គឺពង្រីកបញ្ហាឲ្យមានលក្ខណៈជាបញ្ហាតំបន់ឬអន្តរជាតិ និងបង្ខំឲ្យរដ្ឋាភិបាលថៃប្រើអំពើហិង្សា ឆ្លើយតបទៅនឹងអំពើហិង្សារបស់ពួកគេវិញ ធ្វើយ៉ាងណាឲ្យតំបន់ប៉ែកខាងត្បូងនៃប្រទេសថៃក្លាយជាសមរភូមិមួយនៃ សង្គ្រាមសាសនា Djihad ។
សហរដ្ឋអាមេរិកក៏កំពុងបារម្ភខ្លាំងដែរ គឺបារម្ភខ្លាចខេត្តអ៊ីស្លាមទាំងបីនៅខាងត្បូងប្រទេសថៃក្លាយជា ទីកន្លែងមួយថ្មីនៃ Djihad អន្តរជាតិ ក្លាយជាទីកន្លែងថ្មីនៃជំរំហ្វឹកហ្វឺន របស់ពួកភេរវជនអ៊ីស្លាមជ្រុលនិយមអន្តរជាតិ។ ទីក្រុង Washington បានស្នើម្តងហើយ ម្តងទៀត ឲ្យប្រទេសថៃយល់ព្រមទទួលកងទ័ពអាមេរិកនៅលើទឹកដីខ្លួន។ តែរដ្ឋាភិបាលថៃមិនព្រម ដោយខ្លាចក្រែងវត្តមានទាហានអាមេរិកាំងទាក់ទាញពួកភេរវជនអ៊ីស្លាម ជ្រុលនិយមអន្តរជាតិឲ្យចូលមកក្នុងទឹកដីថៃច្រើនឡើងៗថែមទៀត។
free programes
0 comments:
Post a Comment